រដ្ឋាភិបាលស៊ីរីចាត់វិធានការដើម្បីជំនះផលប៉ះពាល់ដែលអាចកើតមានដោយសារវិបត្តិអ៊ុយក្រែន
ប្រទេសស៊ីរី៖គណៈរដ្ឋមន្ត្រីស៊ីរីកាលពីថ្ងៃព្រហស្បតិ៍នេះបានសម្រេចវិធានការជាច្រើនដើម្បីដោះស្រាយជាមួយនឹងផលប៉ះពាល់ដែលអាចកើតមានដោយសារតែវិបត្តិអ៊ុយក្រែនលើស្ថានភាពសេដ្ឋកិច្ចនៅប្រទេសស៊ីរី។
វិធានការទាំងនោះត្រូវបានសម្រេចក្នុងអំឡុងពេលសម័យប្រជុំតូចពិសេសរបស់រដ្ឋាភិបាលស៊ីរី។ ខ្លឹមសារនៅក្នុងរបាយការណ៍មានបញ្ជាក់ថា វិធានការទាំងនោះបានបញ្ចូលនូវការអនុវត្តជំហានចាំបាច់ ដើម្បីគ្រប់គ្រង និងជំរុញស្តុកសម្ភារៈមូលដ្ឋានដូចជា ស្រូវសាលី ស្ករ ប្រេង អង្ករ និងដំឡូង ក្នុងរយៈពេលពីរខែបន្ទាប់ និងដើម្បីធានានិរន្តរភាពនៃលទ្ធភាពទទួលបានមូលដ្ឋានទាំងនោះ។
ការសម្រេចចិត្តនេះក៏បានរួមបញ្ចូលផងដែរនូវការរឹតបន្តឹងលើការនាំចេញក្នុងរយៈពេលពីរខែបន្ទាប់
សម្រាប់វត្ថុធាតុដើមដែលអាចរួមចំណែកដល់ស្ថិរភាពទីផ្សារ ដែលមានដូចជាប្រេងអូលីវ
គ្រឿងឧបភោគបរិភោគដែលបានរក្សាទុក និងសម្ភារៈផ្សេងៗទៀត
ក៏ដូចជាការគ្រប់គ្រងតម្រូវការទីផ្សារឱសថផងដែរ។
ចំណែកឯវិស័យហិរញ្ញវត្ថុ និងធនាគារវិញ
រដ្ឋាភិបាលបានសម្រេចចិត្តរឹតបន្តឹងការគ្រប់គ្រងលើទីផ្សារប្តូរប្រាក់ដើម្បីធានាស្ថិរភាពរបស់ខ្លួនក្នុងរយៈពេលពីរខែបន្ទាប់។
គួរបញ្ជាក់ផងដែរថា វិធានការទាំងនោះមានគោលបំណងចម្បងដើម្បីដោះស្រាយលើបម្រែបម្រួលសេដ្ឋកិច្ច
ដែលអាចបង្កផលប៉ះពាល់ដល់ទីផ្សារក្នុងស្រុករបស់ប្រទេសស៊ីរីដោយផ្ទាល់ ឬដោយប្រយោល
ដោយយោងទៅតាមការផ្លាស់ប្តូរដែលអាចប៉ះពាល់ដល់ទីផ្សារពិភពលោក ជាពិសេសក្នុងវិស័យថាមពល
អាហារ និងការដឹកជញ្ជូនពិភពលោក៕
ប្រភព៖ huaxia
Post a Comment